Mense soos Gutenberg en Martin Luther het 'n ingrypende rol in die
beskikbaarmaking van die Bybel in volkere se moedertale gespeel.
Deesdae is die studie van die Bybel en bybelvertalings, danksy sulke
gelowiges, wat die stryd deur die versterking van die Heilige Gees
aanhou veg het, baie meer beskikbaar vir Jan Publiek. Daar bestaan
ontelbare hulpbronne om die bybelvertalings al hoe beter na te vors en
sodoende God se Woord al hoe beter te verstaan. Ooreenkomste en
verskille en selfs onderliggende motiverings in vertalings kan met
groter presiesheid nagegaan word.Die Bybel is ook lankal nie meer net
beskikbaar op perkament, boekrolle, in baie ou manuskripte of selfs in
gedrukte formaat nie, maar dit het die nuwe tegnologie, naamlik
rekenaars en die
Internet, ook begin benut.
Mag gelowiges die voorregte wat daar deesdae nog bestaan rondom die
vryelike gebruik van die Woord, waardeer. Soveel Christene het
afgedwaal, lou geword en hul verhouding met die Here bestaan nog kwalik.
Hul bekering was 'n sag geprewelde ja'tjie iewers voor 'n kansel of om
'n kerkkampvuur met die dowwe sleepvoetige deelneem aan tradisies en
rituele vir 'n kortstondige rukkie daarna.
Hul liefdelose verhouding met God het geen diepte of erns nie. Dit
bestaan uit die lang gape van verveling, belangeloosheid in die
wonderlike genade wat God hul daagliks skenk, en selfsugtige
skietgebedjies met 'n lang inkopielys van gee, gee, gee. Dié
ongehoorsame rebellie van erns maak met God en Sy gebod, is 'n baie
ernstige saak.
Die wêreld hou Christene dop en sien skaars die verskil tussen ons en
die goddelose heidene. Baie sogenaamde Christene bly saam, vloek
saam, drink, dwelm en dobbel saam en verwag dan dat hulle nog geseën
moet wees in hul sondige doen en lates!
Daar is ook deesdae al hoe meer teësin en weerstand teen Christene en
ons Bybel. So is daar byvoorbeeld "vooruitstrewende" lande waar
die Bybel nou in skole en in die openbaar of werksplek verbied word.
Gebed in die openbaar word met afkeur en bespotting bejeën. Daar word teenoor Christene gediskrimineer bloot omdat hulle in die
Verlosser Jesus Christus glo en God in waarheid wil aanbid.
Verdraagsaamheid vir bygelowe en afgodery en immorele losbandigheid
word van ons geëis, maar teenoor die Christen is daar geen sprake van
verdraagsaamheid nie. Probeer maar net in die openbaar of in 'n groot
groep verklaar dat Jesus die enigste weg na saligheid is, en kyk hoe
snak sommige van dié wat teenwoordig is van verontwaardiging!
Die inhoud van die Bybel word verwring om elke hoek en draai,
bevraagteken en beredeneer deur "geleerdes" en "wetenskaplikes"; swak
vertaal en ontleed met misleidende politieke en ander bymotiewe; terwyl
die goddeloses, die "ontwikkelde moderne mens", dit probeer afkraak as 'n
mitiese fantasie. Iets wat lankal uitgedien is, argaïes, uiters outyds
en regtig net maar iets is wat saam met die ark en "bell bottoms" uit
die mode geraak het.
Daar kom 'n geslag en 'n tyd waarin die gelowiges en die Bybel met
absolute haat en afsku hanteer sal word, maar ons God is die Enige, Ware
en Heilige God, vyande ten spyt.
Waardeer jy die feit dat jy jou Bybel kan oopmaak en lees? Waardeer
jy God se liefde wat deur die eeue gesorg het dat jy 'n Bybel kan hê?
Gaan dan nou in jou binnekamer en bid tot Hom wat Sy liefdesboodskap tot
daar in jou siel en hart gebring het. Lees jou Bybel met groter
verantwoordelikheid en getrouheid. Begin die woorde en waarhede van die
Skrif met dieper erns en intensheid, met groter sorg uitleef en
kyk hoe die Here jou al hoe meer leer en seën. |
.jpg "ADSA: World, Tree and Acorns")
