Die Pretmakers Vermaaklikheidsgroep, ook bekend as Merrymakers Entertainment, is 'n Christelike besigheids-bediening wat al 22 jaar deur Suid-Afrika beweeg en opvoerings, opleiding en spel hou, met die primêre doel om 'n verskil in jong lewens te maak. Dit gaan ook daaroor om jongmense te aktiveer en te mobiliseer vir Jesus Christus.

Hierdie baie ervare en talentvolle vermaaklikheidsgroep bedien interkerklik, omdat die Liggaam van Jesus Christus vir hulle 'n teer en uiters belangrike saak is. Waar die Vermaaklikheidsgroep van Pretmakers se narre en Mitsie die singende hondjie uitgenooi word, tree hulle graag op. Mimiek en poppespel is ook deel van die pret.

Die fokus is op die jeug tussen die ouderdomme van 4 tot 12 jaar, alhoewel Merrymakers se narre al opgetree het by gemeentes en aftree-oorde. Die aanbiedings van hierdie bediening word prettig uitgevoer en baie humor is betrokke. Deur God se genade is vele gesigte opgevrolik en siele ook geestelik verryk deur die Evangelieboodskap wat deur die jare op die arbeidsveld aangebied is.

Kinders is die span se passie, juis daarom hulle glo dat kindertjies die BBP's in God se Koninkryk is. Die groep is ook baie betrokke by welsynsaksies.

Met hul poppeteater-, spel-, narre-, dans- en mimiek-opleiding, poog hulle ook om kinders te help om hul talente ten volle te ontwikkel en aan te wend tot uitbreiding aan die Koninkryk van God. Opleiding in mimiek, poppespel, grimering, speltegniek, oorklankings en draaiboekskryf is alles deel van die opleiding wat beskikbaar is.

'n Hele aantal CD's en DVD's met sterk geestelike inslag, asook oulike inkleurboeke, prettige vormballonne, kunstige poppekaste, allerlei groottes pragtige handpoppe en goed saamgestelde geskenkpakkies vir kinders, is te koop by hierdie ywerige span.

Skakel of stuur gerus 'n navraag as u die Pretmakers Vermaaklikheidsgroep wil uitnooi vir 'n optrede, gebruik wil maak van hul opleidingsdienste, of as daar enige vrae oor hul groot verskeidenheid pret-en-plesier-produkte is.

DANKIE, u ondersteuning word geweldig waardeer!